Shtetet e Bashkuara ia kanë ndaluar Britanisë së Madhe ndarjen e të dhënave të inteligjencës ushtarake amerikane me Ukrainën, përderisa përkrahja e ShBA-së për Zelenskyn po venitet.
Pas vendimit për ndërprerjen e ndihmës ushtarake amerikane për Ukrainën, agjencitë britanike të inteligjencës dhe kanalet ushtarake u urdhëruan që të mos ndanin inteligjencë të siguruar nga ShBA-ja, e njohur si “Rel UKR” ose “E lëshueshme për Ukrainën”, raporton mediumi britanik, “GB News”.
Që nga fillimi i pushtimit rus të Ukrainës, Britania bashkë me partnerë të tjerë të sigurisë, përfshirë Australinë e Zelandën e Re, kanë ndarë të dhëna me Ukrainën.
Megjithatë, klasifikimi i sigurisë i nivelit më të lartë u hoq rishtazi nga administrata amerikane dhe kjo masë mund ta prekë aftësinë e Ukrainës për ta mbrojtur veten, raporton mediumi “Daily Mail”.
Vendimi i Shteteve të Bashkuara i prek Qendrën Qeveritare të Komunikimit si dhe degët e inteligjencës të Ministrisë së Mbrojtjes të Mbretërisë së Bashkuar.
Në kohën e ngrirjes së ndihmave ushtarake të ShBA-së për Ukrainën, Evropa mund ta vazhdojë mbështetjen për Kievin përmes përdorimit të aseteve të ngrira ruse që të paguajë armë për Ukrainën.
Megjithatë, Shtetet e Bashkuara ofronin pajisje të avancuara në të cilat shtetet e tjera nuk kanë qasje./Nacionale