Dy vetura të zeza, të shpuara nga plumbat, u panë paraditen e sotme në parkingun përpara një qendre tregtare në Çair. Në atë vend humbi jetën 35-vjeçari Habib Bunjaku, i punësuar në administratën e kompanisë shtetërore të energjisë, MEPSO.
Bunjaku ndërroi jetë në spital nga plagët e marra gjatë përplasjes me armë mes dy grupeve. Sipas informacioneve të Telma, ai kishte qenë në një festë në një lokal në qendër dhe, gjatë daljes, u përpoq të ndante dy grupe që po konfliktoheshin.
Në atë moment, Bunjaku u plagos për vdekje, ndërsa policia njoftoi se shkaku i përplasjes me armë mes dy grupeve ishte një mosmarrëveshje në trafik, për të cilën ishin informuar rreth dhjetë minuta para mesnatës.
Raportohet se, për shkak të një konflikti të mëparshëm në trafik, në një hapësirë parkimi në Çair ka ndodhur një përleshje mes dy grupeve, gjatë së cilës është përdorur armë zjarri. Në vendngjarje janë gjetur dy pistoleta, disa automjete dhe objekte të tjera të lidhura me rastin, njoftoi MPB-ja.
Nga incidenti kanë mbetur të plagosur edhe dy persona të tjerë, ndërsa policia ka bërë të ditur se ka arrestuar katër persona. Nuk ka ende informacione nëse mes të arrestuarve është edhe ai që ka qëlluar Bunjakun.
Në kuadër të hetimeve, nga vendngjarja janë marrë prova dhe gëzhoja, të cilat do t’i nënshtrohen ekspertizës. Po ashtu, janë siguruar pamje nga kamerat e sigurisë, të cilat po shqyrtohen nga hetuesit e prokurorisë.