Presidenti në largim i Shteteve të Bashkuara, Joe Biden, të mërkurën përmbylli gjysmë shekulli karrierë politike me një fjalim të fundit në Zyrën Ovale, përderisa shpreson që ta vulosë trashëgiminë e mbetur në hijen e dështimit të demokratëve për ta parandaluar rikthimin e Donald Trumpit në Shtëpinë e Bardhë.
Bideni e hapi fjalimin me një porosi të njohur – duke u kërkuar amerikanëve që të bëhen bashkë, por shpejt paralajmëroi për një grumbullim të rrezikshëm të pasurisë në Shtetet e Bashkuara, raporton agjencia e lajmeve “Reuters”.
“Sistemi ynë i ndarjes së pushteteve, kontrolleve dhe baraspeshave mund të mos jetë i përsosur, por ai e ka mbajtur demokracinë tonë për gati 250 vjet, më gjatë se cilido komb tjetër në histori që ndonjëherë ka provuar një eksperiment të tillë të guximshëm” – tha presidenti amerikan.
Sidoqoftë, ai paralajmëroi për një “kompleks i industrisë së teknologjisë” që po sjell një “ortek keqinformimi e dezinformimi, duke e mundësuar abuzimin e pushtetit”. Sipas tij, shtypi i lirë “është duke u shkërmoqur”.
Fjalimi me parashikime erdhi kur Partia Demokratike e Bidenit ka pak leva në politikën kombëtare dhe Trumpi ka nominuar një grumbull të pjesëtarëve të stafit të cilët janë zotuar për t’i përmbysur aleancat tradicionale amerikane dhe normat qeverisëse.
I detyruar që të largohej nga gara për president në korrik pas një debati katastrofal kundër Trumpit, Bideni është fajësuar nga disa demokratë për humbjen e zgjedhjeve presidenciale, pasi nënpresidentja Kamala Harris humbi në të gjitha shtetet që ishin kyçe për garën.