Tetë të arrestuar është bilanci i festës së mbrëmshme me rastin e Ditës së Flamurit shqiptarë. Ministri i Punëve të Brendshme, Pançe Toshkovski ka informuar se policia ka arrestuar autorët e veprave penale, ndërsa nuk ka dhënë asnjë detal nëse janë arrestuar huliganët maqedonas që dogjën flamujt shqiptarë.
“Njëri është kapur duke tentuar ta djeg flamurin maqedonas, ndërsa të tjerë duke tentuar ta djegin. Falë edhe videove në rrjetet sociale, të njëjtët janë arrestuar. Bëhet fjalë për 8 persona, kryesisht të rinj, katër të dyshuar për vepër penale ‘rrahje’, ndërsa katër të tjerë për nxitje të urrejtjes ndëretnike dhe përdhosje të flamurit të shtetit”, tha ministri Toshkovski.
Ai ka informuar se bëhet fjalë për një të mitur, ndërsa tre që dëmtuan flamurin e shtetit janë persona 18, 19 dhe 20-vjeç, ndërsa rrezikojnë nga një vit burgim.
“Falënderoj policinë për punën që ka bërë dhe identifikimin e autorëve. NMë duhet ta pranojë se në shumë pjesë të vendit kishte festë dhe në pjesë të madhe ishin festive pa provokuar dhe pa i shkelë ligjet. Por në një pjesë, festat nuk ishin si duhet. Fatmirësisht, mbrëmë nuk kishte viktima, nuk kishte incident më të madh ndëretnik”, tha Toshkovski.