Ushtria izraelite ka kryer “sulme të sakta ndaj objektivave ushtarake në Iran”. Në Teheran janë dëgjuar shpërthime të shumta, sipas mediave shtetërore të vendit.
Ushtria izraelite deklaroi se, “si çdo vend tjetër sovran në botë, shteti i Izraelit ka të drejtën dhe detyrën të përgjigjet”, pasi “regjimi Iranian dhe përfaqësuesit e tij në rajon e kanë sulmuar pamëshirshëm Izraelin” që nga 7 tetori 2023.
“Kapacitetet tona mbrojtëse dhe sulmuese janë mobilizuar plotësisht,” thotë ushtria.
“Ne do të bëjmë gjithçka që është e nevojshme për të mbrojtur shtetin e Izraelit dhe popullin e Izraelit”, thuhet në deklaratën e ushtrisë.
SHBA i cilësoi sulmet izraelite në Iran si vetëmbrojtje.
“Ne e kuptojmë se Izraeli po kryen sulme të synuara kundër objektivave ushtarake në Iran si një ushtrim vetëmbrojtjeje dhe në përgjigje të sulmit me raketa balistike të Iranit kundër Izraelit më 1 tetor”, tha një zëdhënës i Këshillit të Sigurisë Kombëtare për partnerin e lajmeve të BBC-së, CBS.
Ky sulm ishte parashikuar që kur Irani lëshoi rreth 200 raketa balistike mbi Izraelin pothuajse një muaj më parë.
Në një deklaratë duke njoftuar se operacioni ishte duke u zhvilluar, zëdhënësi ushtarak izraelit tha se Izraeli kishte “të drejtën dhe detyrën” për t’u përgjigjur dhe se aftësitë e tij mbrojtëse dhe sulmuese ishin mobilizuar plotësisht.
Media shtetërore iraniane ka konfirmuar se shpërthime janë dëgjuar në perëndim të Teheranit.
Një agjenci lajmesh pranë Gardës Revolucionare thotë se disa baza ushtarake në perëndim dhe jugperëndim të kryeqytetit iranian janë shënjestruar.
Shtrirja e sulmeve dhe objektivat e sakta nuk janë ende të qarta.
Agjencia shtetërore siriane e lajmeve thotë se sulmet ajrore izraelite kanë shënjestruar edhe disa objekte ushtarake në zonat qendrore dhe jugore të Sirisë./vizionplus.tv